បារាំង៖ មេដឹកនាំដែលកំពុងកាន់អំណាចរបស់ប្រទេសបារាំងលោក Emmanuel Macron បានជំរុញឱ្យពលរដ្ឋរារាំងគូប្រជែងស្តាំនិយមរបស់គាត់ Marine Le Pen ពីតំណែងប្រធានាធិបតីនៅពេលដែលអ្នកទាំងពីរឆ្ពោះទៅមុខក្នុងការបោះឆ្នោតប្រធានាធិបតីថ្ងៃទី២៤ ខែមេសាខាងមុខ។

នៅក្នុងសុន្ទរកថាទៅកាន់អ្នកគាំទ្រលោក Macron បាននិយាយថា «គ្មានអ្វីត្រូវបានសម្រេច» ហើយបានសន្យាថាគាត់នឹងធ្វើការដើម្បីបញ្ចុះបញ្ចូលអ្នកបោះឆ្នោតទាំងអស់ រួមទាំងអ្នកដែលបានបោះអនុប្បវាទ ឬបោះឆ្នោតឱ្យបេក្ខជននៅខាងស្តាំដៃ និងឆ្វេងនិយមឱ្យបោះឆ្នោតឱ្យគាត់ផងដែរ។

លោកថា៖ «ចំពោះជនជាតិបារាំងទាំងអស់ដែលជ្រើសរើសអនុប្បវាទ ឬបោះឆ្នោតឱ្យក្រុមជ្រុលនិយមទាំងអស់ ដោយសារពួកគេខឹងនឹងវិសមភាពដែលបន្តកើតមាន ភពផែនដីដែលត្រូវបានបំផ្លាញ ភាពអសន្តិសុខប្រចាំថ្ងៃ ការលំបាកក្នុងការរស់នៅសមរម្យទោះបីខំប្រឹងធ្វើការ ឬដោយសារពួកគេមានអារម្មណ៍ថាត្រូវគេទុកចោល។ ខ្ញុំចង់បញ្ចុះបញ្ចូលពួកគេនៅថ្ងៃខាងមុខថា គម្រោងរបស់យើងមានការឆ្លើយតបខ្លាំងជាងបើប្រៀបធៀបទៅនឹងក្រុមជ្រុលនិយម និងបញ្ហាប្រឈមនៃពេលវេលារបស់យើង។ អ្នកអាចពឹងផ្អែកលើខ្ញុំបាន!»

បារាំងបានបញ្ចប់ជុំទីមួយនៃការបោះឆ្នោតប្រធានាធិបតីបារាំងឆ្នាំ២០២២ កាលពីថ្ងៃទី១០ ខែមេសា ឆ្នាំ២០២២ ខណៈមានបេក្ខជន២រូបកំពុងប្រជែងគ្នាលើតំណែងប្រមុខរដ្ឋកំពូលរបស់ប្រទេសមហាអំណាចមួយនេះគឺប្រធានាធិបតីបច្ចុប្បន្នលោក Emmanuel Macron និងលោកស្រី Marine Le Pen។

ប្រទេសបារាំងនឹងរៀបចំការបោះឆ្នោតជ្រើសរើសប្រធានាធិបតីនៅថ្ងៃទី២៤ ខែមេសា ឆ្នាំ២០២២ខាងមុខ៕